"Qiymətli kağızlar bazarı haqqında" Azərbaycan Respublikasının Qanununa əsasən 2016-cı ildən etibarən maliyyə vasitəçiliyi (İnvestisiya fəaliyyəti üzrə) fəaliyyətini göstərən şirkətlər İnvestisiya şirkəti adlanmaqdadır. İnvestisiya şirkəti fəaliyyəti lisenziyalaşdırılmış fəaliyyətdir və hal-hazırda bu fəaliyyət üzrə lisenziya Azərbaycan Respublikası Mərkəzi Bankı tərəfindən müddətsiz olaraq verilir.  Azərbaycan Respublikası Mərkəzi Bankı lisenziyaların verilməsi ilə yanaşı həmin şirkətlərin fəaliyyətinə nəzarəti də həyata keçirir. Müvafiq lisenziyanın alınması qaydaları, həmçinin İnvestisiya şirkətləri ilə bağlı əsas müddəalar "Qiymətli kağızlar bazarı haqqında" Azərbaycan Respublikasının Qanununda göstərilmişdir. Bu Qanuna əsasən İnvestisiya şirkətləri aşağıdakı əsas və yardımçı xidmətlərin göstərə bilərlər:

Əsas investisiya xidmətləri (əməliyyatları) aşağıdakılardır:

1. qiymətli kağızlar və ya törəmə maliyyə alətləri ilə aparılan əməliyyatlarla bağlı müştəri sifarişlərinin qəbul və icra edilməsi;

2. fərdi investorların portfelinin idarə edilməsi;

3. investisiya məsləhətləri verilməsi;

4. qiymətli kağızların öhdəlik götürmədən yerləşdirilməsi və anderraytinqi;

5. qiymətli kağızların öhdəlik götürməklə yerləşdirilməsi və anderraytinqi;

6. mərkəzi depozitarın və fond birjasının üzvü qismində öz hesabına qiymətli kağızlar və ya törəmə maliyyə alətləri ilə əməliyyatlar aparılması;

7. marja ticarəti.