22 iyun 2022-ci il tarixində Türkiyədə maliyyə və investisiya texnologiyaları (Fintex) sahəsində lider şirkətlərdən biri olan İnfina Yazılım şirkəti ilə Assosiasiyamızın üzvləri arasında görüş keçirilmişdir. 

Görüşdə İnfina Yazılım şirkətindən direktor və direktor müavinləri iştirak etmiş və İnfina Yazılım Şirkətinin texnoloji həlləri, xidmətləri barədə iştirakçılara ətraflı məlumat verildi. Bildirildi ki, İnfina Yazılım şirkəti artıq 26 ildən çoxdur ki, Türkiyədə fəaliyyət göstərir və Türkiyədən kənarda da öz fəaliyyətlərini genişləndirmək niyyətindədir. 

Eyni zamanda görüş zamanı Azərbaycan Kapital bazarının mövcud durumu və gələcək prespektivləri müzakirə olundu. Bildirildi ki, hazırkı dövrdə, digər sahələrdə olduğu kimi, Azərbaycan Kapital bazarında da əməliyyatların tamamilə elektronlaşdırılmasına ehtiyac vardır və bu istiqamətdə Türkiyənin uzunmüddətli təcrübəsinin öyrənilməsi, Azərbaycanda tətbiqi proseslərin daha da sürətli inkişafına yardımçı ola bilər. Bu baxımdan görüş iştirakçıları bu cür əlaqələrin daha da genişləndirilməsi məqsədilə gələcəkdə də həm birgə, həm də ikili görüşlərin keçirilməsi üzrə razılığa gəldilər.

Görüşün sonunda həm İnfina Yazılım şirkətinin nümayəndələri, həm də Assosiasiyamızın üzvləri görüşün keçirilməsi ilə bağlı məmnunluqlarını ifadə etdilər və xatirə şəkli çəkdirdilər.